O Aperila o le tausaga nei na tusi atu ai le Minisita o le matagaluega o tina ma tamaitai atinae o afioaga ma aga fesootai i le Fono Faavae a le itumalo faapalota o Lepa, ma logo iai le taofia o le toe faamatuu iai o tupe o le poloketi tasi le miliona tala, pe a lē tausisia ma usitaia taiala o loo faataoto atu e le Malo e faagaoioia ai lea polokalame.

Na mafua lea tusi a le Minisita le afioga Leota Laki Lamositele Sio, ona ua tauaao e le Komiti Faafoe o le poloketi, lipoti ma faamatalaga tau suetusi i le faaaogāina o le uluai seleni e 200 afe, ma ua faailoa ai le maoae o le tupe e 96 afe tala ua totogi ai le lisi o le ofisa o le Fono Faavae a le itumalo mo le fa tausaga lea ua faaaogā ai le maota o le EFKS i Lepa, ma ua lē ogatasi ma taiala o le poloketi a le Malo.

Na fautuaina ai e le Minisita ma le komiti faafoe le Fono Faavae a le itumalo, ia aveese le faipule ma le tofi taitaifono faapea sui o le komiti ae o le a faia ni suiga i le totogiina o le lisi o le ofisa ina ia tausisia ai tulafono o le faaaogāina o tupe a le Malo.

Ua faailoa foi e le Minisita i lana tusi faasea mai nisi o le itumalo ua oo atu i le komiti faafoe o le poloketi, ona o le fai toatasi e le taitaifono o tonu e aunoa ma le soalaupule faatasi. 

I le tali a le Fono Faavae ua avea ai le sui taitaifono ma sui o le taitaifono ma le komiti le susuga Auelua Samuelu Enari, ua faailoa atu ai i le Minisita le teena e le komiti atoa o le fautuaga, ma faailoa ai e le sui taitaifono o loo sosolo le faaaogāina o tupe i le taiala ua faataoto atu.

Ua faailoa e le sui taitaifono i le tusi i le minisita, e leai nisi tuutuuga o le lisi e pei o se faiga faavae na tuuina atu e le matagaluega o gafa ma le poloketi.

O aseta foi ma isi meatotino uma o loo malu i totonu o le ofisa o le Fono Faavae.

O Lepa le isi itumalo e lei faamatuuina iai se vaega tupe o le miliona tala muamua, lea ua mae’a faamatuu atu i isi itumalo faapalota o le atunuu.

Ua faailoa e le Minisita i lana tusi e talu ai tulaga ua aliali mai i le maoae o le totogi o le lisi o le ofisa o le Fono Faavae a lea itumalo, ua faia ai se aiaiga fou ia le silia ma le 2 afe tala le totogi i le tausaga o se lisi o se fale ma se fanua o loo faaaogā i se ofisa o se Fono Faavae a se itumalo.

O le vaiaso nei na faailoa ai e le matagaluega o tina ma tamaitai atinae o afioaga ma aga fesootai pasene o itumalo ua latou faagaoioi le atinae o le miliona tala i Iona vaega eseese e tusa o le taiala ua lima taitaiina ai komiti o Fono Faavae e faatino ai le poloketi.