Ua teena ma lē talia e le Failautusi o le Fono Aoao Faitulafono le talosaga tusitusia a nisi o tagata palota o le itumalo faapalota o Lepa, mo se isi avanoa e faia ai se iloiloga a le Palemene i le faaiuga ua faasala ai mo le 2 tausaga ua faamalolo le tumau ai lo latou sui faipule le susuga Tuilaepa L Sailele Malielegaoi.

Ua faailoa mai e le Failautusi le susuga Leatisa Uitime Tala ina ua maua se feiloaiga i lona ofisa i le Aso Lua, ua le talia le talosaga na momoli atu e le sui faipule o nofoa faaopoopo o tamaitai i le Palemene, le afioga Aliimalemanu Alofa Tu’uau, ona ua noatia i aiaiga o Tulafono Tumau e mafua ona ua taoto nei i le faamasinoga le mataupu, e pei ona toe lu’i ai e le faipule o Lepa ma le faipule o Faleata 3 le faasalaga a le Palemene. 

O Tesema o le tausaga na tea nei e pei ona faailoa e le Failautusi o le Fono, na taunuu muamua atu ai le tusi talosaga a nisi o tagata palota o le itumalo faapalota o Lepa, ua faailoa atu ai le oia ma le afaina o o latou aiātatau i le leai o se latou leo i totonu o le Palemene ona o le umi o le faasalaga o lo latou faipule.

O le talosaga lea na oo atu ai nisi o matai o le itumalo o Lepa e molimoli atu ae na ave iai le fautuaga i le matai na taitaia atu le savali, e toe ave le latou talosaga e teuteu atu nisi o faaupuga ua lē faaaloalo ai i le Palemene.

Na tatali le toe faaoo atu o le talosaga tusitusia ae na faaalia e Leatisa, o Fepuari o le tausaga nei na faaoo atu ai loa e le faipule tamaitai le afioga Aliimalemanu Alofa Tuu’au, ua faamaopoopo uma iai tapenaga mo le tuuina atu i le Palemene, peitai ona o aiaiga o Tulafono tumau ma le taoto o le lu’i a Tuilaepa i le faamasinoga, ua le mafai ai ona talia le fanoga mo se isi iloiloga a le Palemene i le faaiuga.

Ua faailoa foi e le failautusi, o le faaiuga ua mae’a faaiu a le Fono Aoao i le mataupu, e le toe mafai ona tagofia.

Na faailoa mai foi e le Failautusi o le Fono, e iai se isi tusi talosaga mai nisi lava o tagata palota o le itumalo o Lepa, na taunuu atu i lona ofisa, ae o lea talosaga ua tetee ai i le talosaga na muamua faaoo atu i lona ofisa, lona uiga o lea talosaga e latou te lagolagoina le faaiuga ua fai i sui faipule lea ua faamalolo lē tumau ai.

O le faaiuga e ala i le faasalaga 2 tausaga ua faamalolo le tumau ai mai le toe auai i le Palemene ma fono a komiti faapalemene, ma ua tapu foi ona toe ulufale i le lotoā o le Palemene, ma taofia foi le toe maua o totogi o faipule o Lepa ma Faleata 3.

Ua mafua le faasalaga ma ona aiaiga ona ua faamaonia lo la soli o tulaga mamalu ma amio taualoa a le Palemene e mafua i ni lafoga ua faale-migao ai i le Palemene.

Ua faamaonia foi i le Faamasinoga Sili o la moliaga o le faalemigao i le faamasinoga, o le mafuaaga lea o le suesuega a le Komiti o Tulaga Mamalu ma Aloaia a le Palemene i le talosaga na tuuina atu e le faipule o Gaga’emauga Numera Tasi le afioga i le Sui Palemia.