E 18 moliaga o loo molia ai le sui a faipule o Salega 1 o Fepuleai Faimata Su’a, e 4 moliaga o loo molia ai Li’o Faataumalama Auava ma le tamaitai o Lise Marie Schmidt e 9 moliaga o loo molia ai.
Ma e iai foi isi moliaga o loo molia faatasi uma ai i latou ia.
Mo le alii faipule o moliaga e aofia ai moliaga e 7 o le taupulepule e ufiufi le mea moni, 4 moliaga o lona faufau o ni molimau ma isi moliaga o le taupulepule e faatino se soligatulafono.
Mo Li’o Faataumalama Auava e 3 moliaga o le taupulepule e ufiufi le mea moni ma le moliaga e tasi o le taupulepule e faatino se soligatulafono.
Ae mo le tamaitai o Lise Marie Schmidt e 9 moliaga o loo molia ai e aofia ai moliaga e 3 o le faalafi o se tagata o loo saili e leoleo, o le lē usitaia o aiaiga o loo tatala ai i tua, o le fafauina o mau, ma le taupulepule e ufiufi le mea moni.
Ma na tuuina atu tali tetee a i latou ia e tauala atu ia latou loia i le aoauli ananafi.
Na tuu atu foi le talosaga a le alii faipule i le faamasinoga ina ia taofia le isi aiaiga o loo tatala ai i tua o le saini faalua lea i le ofisa o leoleo.
Sa faailoa e le tamaitai loia Tanya Toailoa o lea aiaiga e aafia ai tiute faafaipule a lē o loo tuuaia, aemaise lava pe a fia malaga i Savaii i lona itumalo i aso o loo saini ai.
Peitai na teena malosi e le loia a le itu a leoleo o Leinafo Taimalelagi Strickland.
Faaalia manino e Leinafo e lē tatau ona avea le tofi faipule o Fepuleai e fai ai se faiga faapitoa mo ia mai isi o loo molia i lenei mataupu.
Ta’ua e Leinafo afai ae iloilo e le faamasinoga lea talosaga o le suia o aiaiga ina ia mafai ona saini ai le alii faipule e lē gata i le ofisa o leoleo i Apia ae ia faataga ona saini i se ofisa o leoleo o latalata ane i lona itumalo i Savaii.
Ma na teena e le tamaitai faamasino o Talasa Atoa Saaga le talosaga, ae pau le tulaga ua suia o le a lē toe saini faalua ae o le a faatasi ona saini, ma ua iai foi le faatagaga e saini ai e lē gata i Apia ae a malaga i Savaii e mafai ona saini i se ofisa o leoleo o latalata ane i lona itumalo.
O le aso 20 agai le aso 31 o Me o le tausaga nei o le a suesueina ai mau o lea mataupu i le Faamasinoga.
