Search
Search

Tautua le Faailoa Famili mo le manuia o le atunuu

O le ala i le pule o le tautua, o le manulauti poo le anavatau lea a le faalapotopotoga ua ta’ua o le Faailoa Famili o loo tautuaina ai le Pasifika i totonu o Aotearoa. 

O loo galulue sosoo tau’au atu i totonu o ekalesia, aiga ma faalapotopotoga ma le komuniti atoa ina ia mafai ona tauave ma tausoa faatasi se avega o loo fia maua ai se fesoasoani mo le atina’eina o aiga, ekalesia ma aoga a le fanau. 

E tele auaunaga mai le malo faapea nisi o auaunaga tuma’oti i totonu o Niu Sila, o loo galulue faatasi ma le Faailoa Famili, e ala lea i le tuuina mai o ni fesoasoani eseese e tali ai ni manaoga i totonu o faalapototoga taitasi, ekalesia ma aiga. 

O loo iai avanoa e mafai ai ona apalai mo ni seleni, auā polokalame i totonu o ekalesia mo le faatinoina o le aganuu faapea ma taaloga, e mafai foi ona apalai i nisi o auaunaga e mafai ona fesoasoani mo aoga a le fanau, faatūina o se aoga amata faapea foi ma ni pisinisi faatoa tau amata i totonu o aiga ma soo se faalapotopotoga. 

E ala eseese mai faamanuiaga o loo i totonu o Niu Sila lea o loo taumafai le Faailoa Famili e momoli atu mo le lautele o le atunuu. 

O le vaega sili ona tāua ma faafaigofie i lenei auaunaga a le Faailoa Famili ona o le toatele o tatou tagata Samoa o loo mafai ona galulue ai e mafai ona faasoa mai i le tatou lava gagana. 

O le vaiaso ua mavae na toe tumutumu ai le hall a le Te Puke Hall i Otara i tagata eseese mai le Pasifika i le fia faalogologo lea i avanoa ma auala o loo faasoa mai ai nisi o auaunaga a le malo faapea nisi o auaunaga tuma’oti e ono fesoasoani ai i o tatou tagata. 

O sui mai ekalesia i susuga i faafeagaiga, o sui faipisinisi faapea ma aiga ua latou naunau atu ina ia maua lea avanoa. 

Sa vaevaeina le polokalame i lea po i auaunaga taitasi ina ia mafai e tagata uma ona latou maua le auga o le tautua a lea kamupani faapea ma le matagaluega. 

E taifā semina e faia i le tausaga a le Faailoa Famili i le komuniti ona o le naunau lava o lea faalapotopotoga ina ia faasoa le tamaoaiga o Niu Sila mo tatou tagata. 

O le Otara ma Papatoetoe Local Board o loo galulue faatasi ma le Faailoa Famili o loo mafai ai ona tuufaatasia lenei faamoemoe, faatasi ai ma le lagolago a le Te Puke i Otara a ala lea i le hall o loo faaaogāina mo auaunaga.

Tala sili ona faitaulia

SAMOA UPDATE

PODCASTS

Listen on

Tala mai samoa

TALA FOU MAI SAMOA

FAATALATALANOAGA

TALA O TAALOGA

POLOKALAME A LEOLEO

Keep uptodate with Radio Samoa activity & promotion

* indicates required