O le Aso Lulu o le vaiaso nei o le a toe faaauau ai i le faamasinoga le soalaupulega i le va o loia a le Fofoga Fetalai, loia a sui faipule e toatolu ua faamavae ma le pati faaupufai e puipuia aiātatau a tagata, ma le faamasino lea o le a iloa tonu ai poo fea e taoto iai moliaga ua faia e le Fofoga Fetalai, ma se avanoa e masuiga mālie ai le mataupu, poo le faaauau e valaau molimau ma tuuina atu finauga faaletulafono a loia.

E le o mafai ona auai tusitala i le soalaupulega ona o se mataupu e tapu ona auai soo se tasi seia vagana le faamasino ma loia a ē o loo aafia.

Peitai o lea ua faailoa e se molimau faatuatuaina e faapea ua vavala mai i taualumaga o le mataupu, o le a toe foi sui faipule e toatolu le tofa Ale Vena Ale, Tuuu Anasii Leota ma Mauu Siaosi Puepuemai, e toe fai a latou palota laiti.

O le mae’a o vaega o loo totoe o le soalaupulega i le ogatotonu o lenei vaiaso, o le a faamautu ai lea tulaga.