Ana lē seanoa le alofa ma le agalelei o ekalesia, o faalapotopotoga ma tagata taitoatasi, e le mafai e tamaitai Sa o le nofoaga i Mapuifagalele ona tausi ma vaai tina ma tamā matutua o loo tausia i le nofoaga.
O le tautinoga lea a le afioga Mamea o le tamaitai Sa pule o Mapuifagalele le afioga Malia Aloisia Tili, ina ua mae’a tauaao se foai tupe sefulu afe tala i le vaiaso nei, mai se tasi o faalapotopotoga i lo tatou atunuu.
Faaalia foi e le tamaitai Sa pule, e maeu le agalelei o le atunuu aemaise foi o fafo atu o Samoa o loo maua ai seleni ma isi vaega manaomia mo le faaauauina o le latou galuega.
O le faafetai foi a le afioga Mamea ona o nisi o alo ma fanau a Samoa lauiloa i le musika ua ofo a latou taleni pese i se koneseti o pesepesega o le kilisimasi e faia i Otara i Aukilani Niu Sila, i le faamoemoe e saili fesoasoani ai mo Mapuifagalele ma le nofoaga o tamaitai Sa monike i Vailima.
O se faamoemoe e iai le talitonuga ua fetaui ma onomea ma le agaga o le Kilisimasi o le faimeaalofa mo isi aemaise o tagata o loo fia maua le fesoasoani.
Le tamaitai Sa Pule o Mapuifagalele i se talanoaga, le afioga Mamea poo sister Malia Aloisia Tili.
