Ua taunuu nisi o sui o le faigamalo a Amerika Samoa mo le fono o le Atoa o Samoa o le a usuia i Apia i lenei vaiaso, e pei ona faailoa e se molimau o le Aso Gafua na taunuu ai se vaega o lea usugafono i faauluuluga o nisi o matagaluega a le faigamalo a Tutuila ma Manu’a.

O le afiafi o le Aso Lua e taunuu ai le Kovana Sili le afioga Lemanu Peleti Palepoi Sialega Mauga ma nisi o sui o lana faigamalo, a o lumanai ai le fonotaga ma taitai o le Malo Tutoatasi o Samoa, lea ua faamoemoe e amata i le ogatotonu o lenei vaiaso ae mae’a i le Aso Faraile.

Ua iai le talitonuga o se tasi o mataupu tau femalagaa’iga i le va o Samoa e lua ua faamoemoe o le a toe asiasi iai talanoaga o le mataupu i pemita e ulufale atu ai tagatanuu o Samoa Tutoatasi i le teritori, faapea pemita o loo tuuina atu mo tagatanuu o Amerika Samoa e ulufale mai ai i le Malo Tutoatasi.

O se isi lea o mataupu e pei ona silafia sa le maua iai se finagalo autasi o taitai o Malo e lua i nisi o feiloaiga ua tuanai, ina ua amata ona faataoto e le faigamalo i Sasa’e le aiaiga o le faia o pemita ulufale mo tagata malaga mai Samoa Tutoatasi, ae tatala pea le malaga mai o i latou e aunoa ma ni pemita.

Na alu a’i lea faiga oo ina toe talosaga Samoa tutoatasi e faapafala pemita ulufale ae sa le talia. O le mafuaaga lea na oo ai ina faia le aiaiga a le Malo o Samoa e faatino loa pemita ulufale mo tagatanuu o Tutuila ma Manu’a e afea Samoa.

O le tausaga e 2017 na sii ai e le Malo o Samoa le totogi o le pemita ulufale mo tagatanuu o Amerika Samoa, ma sa iai le fuafuaga o talanoaga i le va o Malo e lua i lena tausaga e talanoaina ai lea siitaga, peitai e lei mautu i se taotoga lelei lea mataupu.

O le tatalo lautele o loo iai ina ua tulai mai suiga o faigamalo e lua e pei ona iai nei Samoa o loo i Sasae ma Samoa o loo i Sisifo, ia toe foi i le tulaga sa sau ai i le tele o tausaga ua mavae, o le femalaga a’i saoloto o tagata o Samoa e ui ina eseese faiga ma auala o loo faafoe ai faigamalo e lua, e aunoa ma le toe faia o ni pemita ulufale.