E toatolu minisita lagolago ma le Pelesetene o le faalapotopotoga o le au fai faletalimalo i Samoa ma le silia i le 200 pasese o tagata faipisinisi mai Saina, na avea o pasese muamua i le uluai malaga tuusa’o a se vaalele la’upasese mai Saina ua malaga mai mo Samoa.
O le faatoa faatino lea o taumafaiga mo ni malaga mai lea vaega o Asia, e afea ai lo tatou atunuu ma o se taumafaiga na amata faatino i le tausaga e 2015 na faamautu ai le laisene e afea ai Samoa e vaalele la’upasese mai Saina.
O le afiafi o le Aso Sa mulimuli o le masina nei o Me na taunuu ai lea uluai malaga poo se inaugural flight, ma e valu aso o le a nonofo ai i Samoa le pasese e luaselau ma ona tupu.
Ua faaalia i se pepa o faamatalaga ua tapena se polokalame mo le asia e le aumalaga o nofoaga o mataaga mo le atina’e o tagata tafafao.
Ua iai le fuafuaga o le masina fou e amata faia ai malaga tuusa’o mai Saina e tasi i le vaiaso, ma o se avanoa lelei tele mo le siitia ai o tulisi mai Asia e tafafao i lo tatou atunuu.
O se taimi tāua foi ona o loo tapena le fono a Malo o le Taupulega i le tausaga fou o le avanoa lea mo nisi tagata e malaga mai mo lea fono faavaomalo e faaaoga ai le alavaa i le va o Saina ma Samoa.
