E ui ina faatuai ona taunuu nisi o malaga a vaalele sa agai mai i Samoa i le faaiuga o le vaiaso ona o suiga i taimi e tu laueleele ai i lo tatou atunuu, peitai na taunuu uma mai tamaitai sa malaga mai Papua Niu Kini, Nauru, Solomona, ma Amerika Samoa a o lei amata aloaia le polokalame.
O lea sa lolotu ai tamaitai tausala e toalima mai motu o le Pasefika i le sauniga o le taeao a le Ekalesia Metotisi i Satapuala, ma sa tali ai ma le sua i le toonai o le Aso Sa a le ekalesia.
O le afiafi o le Aso Sa na faia ai le se’iga pepa e faatulaga ai le numera o tamaitai e faasolo ai le polokalame o le sailia o se Tausala o le Pasefika i le faaiuga o lenei vaiaso.
O le Aso Gafua le amataga o lenei vaiaso ua malaga ai i lo tatou motu i Savaii tamaitai lea o le a faia ai se ‘ava o le feiloaiga ma latou asia nisi o nuu ma afioaga e pei o Vailoa Palauli o le a molimauina ai le gaosiga o le siapo.
O le a asia ai foi nisi o faletalimalo e pei o le Le Lagoto ma le Steveson i Manase mo le faia ai o nisi o latou polokalame faatulagaina.
O le a latou asia foi le nofoaga o le Lava Field i le afioaga o Saleaula, o le Harbour Side, ma le nofoaga o tamā ma tina matutua le Mapuipulotu Home for Aged Care.
O le Aso Lua e mae’a ai le latou asiasiga i Savaii ona toe taliu mai ai lea i Upolu mo nisi o polokalame ua faatulagaina.
