E ui i le pē o le isi afi o le vaalele, ae faafetaia o lea na tulaueleele manuia.

O le faigamalaga lenei a le Qantas na tuua Aukilani mo Sini i Ausetalia ananafi i le afiafi ma pe ā ma le toe tasi le itula taunuu ae faaletonu loa le isi afi.

I molimau a nisi o le pasese i tala a le leitio a Niu Sila latou te lei iloaina se faaletonu a o iai i luga o le ea, ae na faatoa logotala ina ua tulaueleele.

Ae mo aiga o le silia ma le 140 pasese na molimau i luga o le social media i le popole ma le lē mautonu ina ua maua tala.

Na faatali mai i le malaevaalele leoleo, taavale a le falemai faapea ai ma le vaega o tineimu ma o lea na tulaueleele saogalemu.

Mai le Qantas o lea na lelei ona foe e le aufaigaluega le vaa i le itula mulimuli na faaauau ai le faigamalaga.