Ua iai se maliega ua taunuu iai feutanaiga i le va o le Malo ma sui o le aufaifaatoaga i le mataupu e faatatau i se faiga e faaitiitia ai aafiaga o le latou foi matafaioi i le siosiomaga, le emissions reduction scheme. 

Sa galulue faatasi itu e lua i le taumafaiga o se maliega ma toe lipoti ane ai se tali i le faaiuga o le tausaga nei, o le aso la ua faatino ai lea tulaga ma ua aofia ai ni suiga ua malilie iai itu e lua. 

Saunoa ai le Palemia o Niu Sila e faapea i le mae’a o le faalogologo i finagalo faaalia o le autotolaau ma faifaatoaga i le mataupu lenei, ua faatino nei le isi laasaga tāua i le agai i luma o itu e lua ma o le faamoemoe ina ia lagolago i le aufaifaatoaga ma puipuia lelei foi le siosiomaga.