O le taeao nei na tuua ai e le Palemia o Niu Sila ma lana aumalaga faatasi ai ma sui o ofisa faasalalau le atunuu ae malaga atu i Samoa mo le faamanatuina o le 60 tausaga o le Feagaiga a Mālō e lua le Treaty of Friendship.
O lenei faigamalaga o loo faaaogāina ai le vaalele a le Mālō le NZDF ma e faamoemoe mo le aso e tasi. Na faamaonia mai e le Tamaitai Palemia o Samoa Fiame Naomi Mataafa i le vaiaso na te’a nei ia tapenaga ma fuafuaga uma o le taunuu atu o le faigamalaga a Jacinda Ardern ma nisi o ana Minisita.
O ia fuafuaga e aofia ai se ‘ava o le feiloa’iga i le afiafi nei, le guard of honour i lumā maota o le Mālō i le aso a taeao ma nisi o feiloa’iga ma Minisita o le Kapeneta a o le’i toe tuua Samoa i le aso a taeao.
O le faamoemoe autu ina ia saga faamausalīina sootaga faalemalo a atunuu e lua ma faamanatu ai le tele o tausaga talu ona sainia le maliega poo le Feagaiga o Faauoga a Samoa ma Niu Sila mai le 1962.
E pei ona silafia o le aso a taeao e taunuu ai foi i Samoa le uluai faigamalaga a le vaalele talu ona toe tatala aloaia i le asō nei faigamalaga mo soo se tagata talu mai le lata i le 3 tausaga o tapunia ona o puipuiga o le faama’i o le Koviti-19.
