Ua toe aliali mai se isi gaioiga solitulafono o le taufaasese ma le taufaaleaga ua faaaogā ai auala o fesoota’iga televavave le social media, ua toe aafia ai se tasi o Minisita o le Kapeneta le tofa Leatinuu Wayne Sooialo.

Ua agiga i luga o le api o foliga se faasalalauga i le itulau ua faaigoaina o Olp Samoa, o loo faailoa ai e se tagata o lona suafa o Lalagofaatasi Pepegrace Ruta e faapea sa valaau atu le minisita ia te ia ma talosagaina se fesoasoani tau tupe.

O loo faailoa ai e lea tagata sa ia ave le 700 tala i le talosaga a Leatinuu.

O loo iai i lea faasalalauga ma le ata o le faletua o le minisita ma se fale, ma e faapea o le maota lea o le minisita.

Ua faailoa i se faasalalauga faalaua’itele mai le faigamalo a le F.A.S.T. Govt, o le Minisita o loo i fafo i se malaga faalemalo ma e le’i faia se fesoota’iga a Leatinuu ma lea tagata ua faia le faasalalauga ma o se gaioiga e lē moni ma taufaaleaga i le tulaga ta’uleleia o le Minisita.

Ua teena foi i le faasalalauga mai le faigamalo ata o le fale ona e lē o se meatotino a le Minisita ma lona aiga.

O le faaaogāina foi o le ata o le minisita ma lona faletua e lei iai se faatagaga e faaaogā ai.

Ua toe lapata’ia ai le atunuu e faaeteete i ia ituaiga o faasalalauga ua faaaogā ai nisi o Minisita o le Kapeneta, peita’i e lē o ni faasalalauga e moni ma talitonuina.

Ua silasila le minisita e uia ala faaletulafono e sa’ili ai i latou ua faia lea faasalalauga e lē gata e lē moni, ae taufaasese ma taufaaleaga.