Ua toatolu nei i latou ua nofosala i le falepuipui ina ua faamaonia o latou moliaga o le taupulepule e faaoo le maliu i lē sa avea ma Palemia le susuga Tuilaepa L Sailele Malielegaoi.

O Taualai Leolia na muamua nofosala mo le lima tausaga ina ua ioe i le moliaga, sosoo ai ma Lema’i Faioso Sione ma Malele Atofu Paulo na faia iai le faasalaga faafalepuipui i le Aso Faraile na tea nei.

O Lema’i e 4 tausaga 6 masina ae o Malele poo King Faipopo e 4 tausaga lona faasalaga.

I le lauina o le faaiuga i le Aso Faraile ua mavae, na toe talosaga Malele mo se 3 masina e tuuina atu e tapena atu ai ni ana mau fou e lagolago ai se isi ana taumafaiga e tolo ai pea le lauina o se faaiuga a le faamasinoga.

Peitai na faaalia e le afioga Vui Clarence Nelson o le faamasino sinia o le faamasinoga sili e leai se isi mafuaaga tatau e toe tolopo ai ma tuu avanoa ai pea, ae ua tele avanoa sa maua e Malele mai le faamasinoga.

O lana talosaga e tolopo se’i saili se loia mai fafo ona ua ia lē talitonuina loia i Samoa, e leai se loia na maua mai fafo ma faaauau ona lau le faaiuga i le faasalaga.

O Lema’i Faioso Sione o loo iai lana talosaga ua toe apili ai le faaiuga na faamaonia ai lana solitulafono ma o loo taoto e faatoa valaau i le taimi e toe tauaofia ai le faamasinoga o talosaga a le faamasinoga maualuga.

O Malele sa manao e apili le faaiuga peitai ua leai sana loia e tapenaina lea laasaga, seia vagana ua manao e na te tauave sea talosaga apili e ia lava e aunoa ma se loia. Sa ou fesili iai i sona lagona poo ua ia silafia ua faia le amiotonu mo ia i le faaiuga ua aumai i le faasalaga, a o lei auina atu e leoleo i le potu e faatali ai le taavale e malaga ai i le falepuipui i Tanumalala.

Le susuga Malele Atofu Paulo poo King Faipopo o se igoa o loo iloa tele ai i luga o fesootaiga televavave ma upega tafailagi.

Ua faia le poloaiga a le faamasinoga e taofia ai le faasalalauina o mau uma sa suesueina ona e aafia ai aiātatau o se tasi o loo tuuaia i le moliaga lava e tasi ua faamaonia faasaga ia Taualai, Lema’i ma Malele, o ia lea o Talalelei Pauga, o le a aumai faapagota mai Ausetalia ise taimi o le tausaga nei e tali i le moliaga i le faamasinoga maualuga a le atunuu.