O lea ua folasia nei i luma o le faamasinoga sili a le atunuu le tagi a le susuga Tuilaepa L Sailele Malielegaoi faapea le tofa Lealailepule Rimoni Aiafi, ua la lu’i ai le Fofoga Fetalai ma le faaiuga a le Fono Aoao Faitulafono ua faamalolo le tumau ai mo le umi e 2 tausaga.
O le amataga o lenei vaiaso ina ua amatalia galuega a le faamasinoga i le tagofia o mataupu e faaulu atu iai, na valaau ai le mataupu a le taitai o le vaega e puipuia aiātatau a tagata ma se tasi o sui faipule o le faafaletui.
E lei mae’a ona tuuina atu tapenaga a le itu tagi e pei o faamatalaga faatauto lea ua faailoa e le alii loia Niu Sila o Dr Harrison o loo tauaveina le tagi e tatau ona tuuina atu i le faaiuga o le vaiaso nei.
O faamatalaga tauto ia o le a iloa ai mau o loo faavae ai le lu’i faaletulafono e pei ona fesiligia ai le faaiuga a le Palemene.
O le aso 13 o Fepuari ua toe tolopo iai le mataupu ma e tatau ona oo atu i le aso lea ua tuuina atu uma tapenaga e aofia ai ma tali tusitusia a itu o loo tuuaia e tali ai i le itu tagi.
O le itu a le Fofoga Fetalai ma le Fono Aoao Faitulafono ua faailoa e se loia sinia mai le ofisa o le Loia Sili a le Malo i luma o le faamasinoga, o loo faia feutanaiga ma se loia i Niu Sila e na te finauina mau a le itu ua molia e Tuilaepa L Sailele Malielegaoi ma Leaailepule Rimoni Aiafi.
O loo iai le talosaga a le loia a le itu tagi mo le faatulaga lea o le mataupu e suesueina i se taimi vave, peitai ua faailoa e le afioga i le faamasino susuga Leiataualesa Darrel Clarke, e manaomia le faaoo uma atu o tapenaga o loo manaomia, ona fuafua ai lea o aso ma taimi e faatulaga ai suesuega a le faamasinoga.
