Ua faamautu mai e le Komesina o leoleo le taunuu mai ai i le faaiuga o le vaiaso nei o le fomai faapitoa na te faia taotoga mo tino maliu o loo taooto ai i le Falemaliu o le Falemai tele i Motootua.
Na faailoa e Auapaau pe ā ma le fitu maliu o loo manaomia taotoga aua suesuega o mafuaaga na uma ai le soifua, e le gata i tino maliu ae faapea foi ponaivi sa maua mai i se tasi o mataupu lea o le a faia iai suesuega e se alii fomai mo taotoga faapitoa nei mai Fiti.
O nisi o nei maliu sa faapea lea ona amata mai ia Tesema o le tausaga ua mavae ma o le faafitauli tele lava lea o loo tulai mai pea o le leai o se fomai faapitoa e gafa ma lea galuega.
