Ua toe taunuu manuia i fanua le faigamalaga a le Minisita o Faatoaga ma Faigafaiva o le ta’ita’ifono o le vaega faaupufai o le Faatuatua i le Atua Samoa ua Tasi ma lana aumalaga, ina ua mae’a le faamoemoe sa tuua ai le atunuu, o le feiloa’i atu i le au lagolago a le pati faaupufai i Amerika ma Niu Sila ma momoli iai le faafetai i le latou lagolago ma le tapua’iga, a alo faiva i le palota tele ua mae’a.
O le Maota Samoa i Vaitele-tai na fai ai le ‘ava faatali sa tapena iai le vaega faaupufai sa tapua’ia le faamoemoe ina ua taunuu le malaga i le Aso Sa ua mavae atu nei.
A o iai i atunuu i fafo le aumalaga, o le po o le Aso Toonai na taualuga ai le faamoemoe i se taumafataga tele o le afiafi sa faia i Aukilani, lea sa tapena e le au lagolago a le Faatuatua i le Atua Samoa ua Tasi i lea aai tele o Niu Sila, ma sa auai ma le paia maualuga o le atunuu aemaise o tauaiga o uo ma aumeamamae.
