Ua taunuu i Ausetalia le faigamalaga a le afioga i le taitai o le Malo Tutoatasi le Tamaitai Palemia, afioga Fiame Naomi Mataafa, mo lana asiasiga taualoa e tusa o le valaau faaaloalo a le alii Palemia o Ausetalia le susuga Anthony Alabanese ma lona Malo.
O le Aso Gafua le amataga o lenei vaiaso fou ua amata ai lea asiasiga taualoa o le a faagasolo mo le lima aso.
Ua faailoa e le taitai o le Malo o Ausetalia i se pepa o faamatalaga faalauaitele le talimalo o lona Malo ma tagata uma o Ausetalia i le afio atu o le Tamaitai Palemia o Samoa.
O se asiasiga o le a faafeiloai ai le tamaitai Palemia o le tatou atunuu i se tulai faaaloalo a le vaega o le fitafita a Ausetalia i se sauniga faalemalo i le laumua o Canberra, ona sosoo ai lea ma feiloaiga e talanoa ai le tele o mataupu tau i le atina’e o Malo e lua, aemaise o le faamautu o nisi o fesoasoani ma foai a lea Malo o le a tuuina mai mo Samoa.
O se tasi o foai a Ausetalia ua faamautu le tuuina mai i le ogatotonu o le tausaga nei, o le vaaleoleo fou e sui ai le vaaleoleo o le Nafanua II na pa’ulia ma faaleagaina ai lea meaalofa taugata e 30 miliona tala Samoa lona tau.
Ua iai le talitonuga o le a avanoa foi le tamaitai Palemia ma lana aumalaga ona feiloai ma nisi o le mamalu o tagata Samoa o loo alaala ‘aitaumalele i Ausetalia.
O le faaiuga o le vaiaso nei ua faamoemoe e mae’a ai le asiasiga taualoa ma toe taliu mai ai i fanua.
O le afea o Ausetalia i le valaaulia a lea Malo ua faatino ina ua mae’a fonotaga a Minisita o le Va i Fafo a Malo o le Taupulega sa usuia i Lonetona i Peretania.
