A o tālia nei se taunuuga o feuiuia’iga i le va o le pulega o le Tatiana Investments o loo faagaioia le fale kalapu o le R.S.A. ma auaunaga a le Malo e fitoitonu i le mataupu ua taofia ai ona toe faamatuu le laisene o lea pisinisi o loo tu i le taulotoaiga o le taulaga o Apia, ua faailoa e le Sui Palemia o le Peresitene o le sosaiete a fitafita sa i le taua le Return Service Association, lea o loo lisiina atu le fale mo le kalapu a le RSA, o loo taumamao o ia ma sona aafiaga i le mataupu.
Ua faailoa e le afioga Tuala Tevaga Iosefo Ponifasio i le nusipepa o le Samoa Observer, o le sainia o le pepa na faatonuina ai le taofia o le laisene pisinisi na feagai lea ma le Minisita o Tupe le afioga Mulipola Anarosa Ale Molioo.
Ua faailoa foi e le Sui Palemia ua sefulu tausaga e lei toe faafouina le laisene ma e ono oo ai le finauga i se tulaga e faia ai ni moliaga o le pulega o le fale kalapu.
Ua faailoa e le alii pule le afioga Afoa Faleulu Mauli sa avea ma faipule o le Palemene i le paeaiga ua tuanai, e lua laisene pisinisi o loo umia e le Tatiana Investments, o le laisene o le fale kalapu lea ua tapunia, ma le laisene o le fale’aiga le Restaurant and café o loo tatala lea o loo faagaioia i le itu i sisifo o le fale o loo iai ma le fale kalapu o le RSA.
