O lse tasi lenei o vaega ole faalauiloa lea ale Pulega o Eleele i lalo ole Matagaluega o Siosiomaga mo lenei tausaga e tusa ai o le faamoemoe ale Matagaluega ile faamanatuina ai o le Vaiaso o Siosiomaga ile amataga ole masina fou.

Saunoa le Sui o Pulega o Eleele Sa’u Tuaena Faasalaina e ala i le polokalame masani ale Matagaluega i luga o upega tafailagi e faailoa le polokalame a le vaega lenei ole Matagaluega mo le faamoemoe ile masina fou.

“E leo la male laina foi lenei vaitau ile tele o atinae o taumafai ai le atunuu e faia ai galuega tetele ua tele ina suatia ai le laueleele.”

“Pei la ole vaega tonu e ave ai se faamamafa ina ia faaaoga tatau ma faaaoga gafataulimaina ia aua nei gata i nei vaitaimi atinae ia ile faaaogaina ole laueleele.”

Ole ala foi lea na taua ai e Sa’u le tuuina lea ole avanoa i Sui o Nuu ma Sui Tamaitai o afioaga taitasi mo lenei faamoemoe.

“O latou nei lea e fai o sui ole Malo i tua i nuu ma afioaga ina ia mafai ona silasila ma faailoa nei vaega taua o le siosiomaga.”

“Ae le gata i lea ole faaaogaina gafataulimaina o eleele nei aemaise i fanua o le Malo ina ia laugatasia uma tagata ma faaaoga tatau ele gata e maua ai le tamaoaiga ole atunuu ae maua ai foi sina seleni mo le Malo e faatino ai arinae mo le lumanai manuia o ona tagata.”

O nisi o vaega olea toe faalauiloa i le polokalame lenei e aofia ai le tanuina o gataifale, taufusi aemaise le suaina ole oneone mo atinae.

Ole aso 6 ole masina fou seia paia le aso 10 olea faagasolo uma ai polokalame mo lenei faamoemoe.