E faitau selau le pasese a le vaa o le Coral Princess ua mafai ona faamatuu e agai ese mai ma le vaa ina ua tulaueleele i Sini i le taeao analeila ae ua faailoa e silia ma le 100 o loo i luga o le vaa ua faamaonia le aafia i le Koviti-19. 

O lipoti lata mai ua faailoa ai e to’a 114 le aufaigaluega a le vaa ua aafia i le faama’i ma le to’afā o tagata o le pasese.

O popolega ina ne’i tulai mai foi se isi mataupu e pei ona iai muamua i le faato’ā amata mai o le pandemic lea foi na maliliu ai le to’atele i se isi foi vaa faapea ina ua aafia i le faama’i, ua faailoa ai e le premier o Niu Sa Uelese faato’ā mafai ona faamatuu mai pasese e agai ese ma le vaa pe afai e faamaonia e negative le siaki na faia. 

Ua lipotia e le 9News faamatalaga a nisi o pasese e faapea e lei tapa ane se isi o le auvaa e faailoa atu se faamaoniga o a latou test sa faia, o lona uiga foi la e lē faailoaina foi.  

Fai mai finagalo faaalia o nisi ua ese le taimi lenei ma le taimi muamua auā ua lē gata ina to’atele ua faia tuipuipui ae to’atele foi ua mae’a aafia ma iloa āuga o le faama’i ma ua nofo tapena  foi i ona aafiaga.