Ua taugata le tau o fualaau’aina ma fualaau faisua i le 2022, ma e ono fesoasoani iai Gabrielle i lea siitaga.
E 16% lea na sii ai le tau o fualaau’aina ma fualaau faisua i totonu o le tausaga e oo mai i le faaiuga o Ianuari 2023.
O le tau o aano o manufasi ma le i’a na alu i luga i le 9.2% talu mai Ianuari o le 2022, o le tau o oloa o loo tele ina faaaoga mo le gasesega o meataumafa na sii i le 11%, a o meaai mai fale’aiga e 8.3% na alu ai i luga.
I se faamatalaga mai le ofisa o faamaumauga ananafi, e oo mai i le faaiuga o le masina faatoa uma atu, o le aotelega o le tau o meaai na sii lea i le 10.3%.
O ni faamaumauga ua sau ai a o tau fai lagona e le North Island le ma’ema’eā o le afā o Gabrielle, ma ua sau ai ma le lapataiga e ono faaauau pea ona alu i luga le tau o meaai.
