Ua toe tauaofia i le Aso Lua o lenei vaiaso le fono usu a Samoa le fonotaga a le Palemene, i le tuanai ona faataoto i le laulau a fono e le Minisita o Tupe i le masina o Tesema o le tausaga ua mavae, le tala faaopoopo muamua o le tupe mo le tausaga faaletupe o loo faagasolo e mae’a i le faaiuga o le masina o Iuni o le tausaga nei 2024.

O le toe usuia ai o le fono faitulafono mo ana galuega amata o lenei tausaga fou, o le a tuu avanoa ai i sui faipule e saunoa faalauaitele i le tala faaopoopo muamua, lea o le a laga ai manatu e fesiligia ai le toe faaopoopo atu o nisi o vaegatupe mo nisi o matagaluega ma faalapotopotoga a le Malo, ae o le a fesiligia ai foi le tulaga aoao tetele o loo iai galuega faagasolo a le Malo i atinae o le tamaoaiga o le atunuu.

O avanoa foi ia o le a faafofoga ai le tapuaiga a itumalo faapalota i ni mataupu o le a laga e o latou sui faipule mo le lelei au i luma o a latou galuega ma taumafaiga o le atinae, e faasino i le poloketi tasi le miliona tala.

O le tasi o tulaga sa matauina talu mai le fono mulimuli o le tausaga ua mavae, o le suia lea o le vaega o le maota fono ua afio ai le faipule o Salega tasi lea ua afifio faatasi ma sui faipule o Siumu, Vaa o Fonoti ma Faleata tolu, ae ua lē toe afio i le itu o le maota o loo afifio ai minisita o le Kapeneta ma minisita lagolago, ona ua faamuta lona tofi minisita lagolago.

Na faailoa mai e le Fofoga Fetalai i se fesootaiga ma le susuga Papalii Li’o Oloipola Ta’eu Masipa’u, o lana faaiuga ua suia ai le vaega o le maota e alala ai le sui mamalu o lea itumalo ona o tulaga ua aafia ai lona tofi minisita lagolago.

Ua ia faailoa mai foi, e oo mai i le taimi nei e leai se faaseā ua tuuina atu i lona ofisa e tusa o le aafiaga o le faipule i se malaga na ulufale ai i le teritori e aunoa ma se pemita faataga.