Ua lamalama faaiu polokalame o faafiafiaga o le faamanatuina o le Iupeli taimane poo le 60 tausaga o le tatou Tutoatasi e pei ona sa faagasolo i lenei vaiaso, ma o le solo a taavale teuteuina i lenei Aso Faraile ma le lauina o togi o tauvaga eseese, e aofia ai le faamatagofieina o nuu ma itumalo o le a faatino i le faaiuga o lenei vaiaso, a o tālia ai le taualuga o le sailia o se Tausala o Samoa.

O pese ma siva faaleaganuu sa tapena e Itumalo faapalota e fitu mai Upolu ma Savaii, sa faia i le Aso Tofi lea sa molimauina e le afioga i le Ao o le Malo ma lana Masiofo, Sui o le Fono a Sui Tofia ma lona faletua, o le afioga i le Palemia ma Minisita o le Kapeneta, ma le toatele o le atunuu sa tumutumu ai le nofoaga o le Matagaialalua Friendship Park i tuāmaota o le Malo o Fiame Mataafa Faumuina Mulinuu II.