O se vaega o le faamanatuina o le aso faapitoa o tina ma tamaitai i afioaga i tua o le amatalia lea o se aoaoga mo tina faipisinisi.
O le faatinoina o lenei aoaoga ua foai ai e le faalapotopotoga o Tina a Malo Aufaatasi (UN Women) e tauala mai i le Malo o Ausetalia ni masini faatekonolosi e aofia ai le 40 tablets ma le 15 laptops.
O le agaga faafetai i le Minisita o Tina ma Tamaitai Atinae o Afioaga ma Agafesootai, Afioga Mulipola Anarosa Ale-Molioo e tusa ai o lenei fesoasoani ua faamatuu mo lenei aoaoga.
“O le faamoemoe o lenei fesoasoani ina ia siitia le tomai o tina faipisinisi i tekonolosi faaonaponei e lagolagoina ai le faatinoina o a latou pisinisi.
“Ua faatulaga ai le amatalia i le asō se tasi o aoaoga mo tina o loo faatino atinae i maketi e tolu lea e i Fugalei, Savalalo ma Salelologa i Savaii.
“O le naunautaiga ia mae’a ane lenei aoaoga ua faavae se asosi a le aufaipisinisi i maketi auā nisi faamoemoe sili atu mo lo latou atinaeina.
“E momoli tele le agaga faafetai i nisi o paaga galulue na oloolo pitovaa ina ia manuia lenei tapenaga ua tino mai e pei ona iai le asō.”
O le aoaoga lenei o le a faamae’aina i le Aso Tofi o le vaiaso nei.
