I le mae’a o vaiaso na aooga ai le toa sefulufā o pagota i tomai faakamuta ma le fausia o meafale e pei ona sa faafoe lea e faiaoga o le Kolisi o Matata eseese a Ausetalia le APTC, ua faamanuiaina lea taumafai ma ua tauaao e ia pagota o latou Tusipasi mai lea kolisi o matata eseese o loo faagaioia i Samoa i totonu o le nofoaga o loo iai le Iunivesite Aoao a Samoa.
O Tusipasi ua latou maua o se faailoga lea o lo latou ola finau mo nisi tomai aoaoina e mafai ona latou faaaogā e saili ai ni galuega pe faaaogā foi i o latou aiga pe a mae’a ona tuli faasalaga ma toe foi i nuu ma aiga o loo faatali mai.
O le sui o le Malo o Ausetalia i Samoa sa saunoa i le sauniga na tauaao ai Tusipasi ma o se isi lea o pine tāua o le a fai ma talaave mo pagota e toa sefulufā ua maua lea tomai aoaoina, ona ua latou maua ia Tusipasi a o feagai ma le tuliina o faasalaga ma o le a fai pea ma tala faamanatu i o latou olaga.
O le nofoaga o loo iai le falepuipui i Tanumalala sa faafoe ai lea aoaoga ma o le nofoaga foi lea na tauaao ai Tuisipasi a o molimauina e sui o aiga o pagota ua faamanuiaina le taumafai.
O loo faagasolo le isi aoaoga i le tomai o le vaaia o le saogalemu o taumafa mo nisi o pagota, o loo faafoe foi e le Kolisi o Matata eseese a Ausetalia.
