Ua amata aloaia le taimi galue o le Komesina Maualuga filifilia o le Malo o Ausetalia i Samoa le susuga William Carter Robinson ina ua mae’a ona tuuina atu ona tusi tofiga i le afioga i le Sui o le Fono a Sui Tofia le afioga Le Mamea Ropati Mualia i se sauniga faalemalo i le ofisa o le Matagaluega o le va i fafo ma fefaatauaiga.
Ua suitulaga Robinson i le tamaitai o Emily Luck sa tauaveina le tofiga Komesina Maualuga o lea Malo i lo tatou atunuu mo le 3 tausaga.
O le aso 20 o le masina amata o lenei tausaga fou na faalauiloa ai e le Minisita o le va i fafo o Ausetalia le tamaitai o Penny Wong lea tofiga ma ia faailoa ai foi le avea o Robinson ma sui o le Malo Ausetalia i le teritori o Amerika Samoa.
O le tausaga nei ua atoa ai le 53 tausaga o le faiga paaga ma sootaga faavaomalo o Ausetalia ma le malo o Samoa, ma ua faaalia ai e le Komesina Mauakuga filifilia fou, o le pine faamau lea o le mauaa pea o sootaga o malo e lua.
E pei ona silafia i le tele o polokalame o le atinae o le tamaoaiga o le tatou atunuu, o Ausetalia le tasi o paaga totino a Samoa o loo tele ai lona sao.
