Ua savali nei i le 43 tausaga o sootaga faavaomalo o Samoa ma le atunuu o Indonesia ma o ni sootaga o loo tumau pea ona vavalalata ma galulue faatasi ai Malo e lua i tulaga i mataupu o le atina’e o le tamaoaiga, ma isi auaunaga.
O nai tausaga e lei mamao tele atu na agalelei mai ai lea Malo i se foai o ni taavale avema’i poo ambulance mo le Matagaluega o le Soifua Maloloina.
O le faatumau ai pea o ia sootaga faavaomalo ua momoli atu ai i le Ao o le Malo moomooga lelei o le Peresetene o Indonesia o Joko Widodo ma le naunautaiga o lea taitai ia saga faatumau pea le galulue faatasi o lona atunuu ma le Malo ma tagata uma o Samoa.
Na faailoa ia moomooga lelei o le alii Peresetene ina ua saunoa le Amepasa fou o lea Malo i le sauniga na tauaao atu ai ona tusi tofiga o lona filifilia e avea ma sui o Ie Malo o Indonesia mo Samoa.
O le sauniga foi lea i le maota faalemalo o le afioga i le Ao Mamalu o le Malo afioga Tuimalealiifano Vaaletoa Sualauvi II ma lana masiofo, na momoli ai le faafetai a le Ao Mamalu o le Malo i le taitai o Indonesia e ala atu i lona amepasa filifilia fou mo lo tatou atunuu.
