Ua lē o toe gole ma natia ni solitulafono e pei o le faomea ma le gaoi i faleoloa tetele poo supamaketi i lo tatou atunuu i nei aso, auā ua toetoe o faleoloa tetele uma ua faapipii ai mea pu’eata video e iloa uma ai vaega i luma ma tua faapea autafa o le lotoā atoa o iai se pisinisi faapea.
Ua molimauina le tāua o ia masini faatekonolosi auā o le amataga o le vaiaso na silasila ai le to’atele i luga o fesoota’iga i le api o foliga, i se gaoiga i le taeao o le Aso Gafua i se faleoloa supamaketi i Siusega sa faatino e ni alii talavou ma ni tamaitai se to’alua. Sa latou fafao ai nisi o oloa i o latou laei, o nisi oloa sa fafao i totonu o se faamalu ona latou tuua lea o le faleoloa e aunoa ma le totogiina.
Ua i lima nei o leoleo ata video mai mea pu’eata a le faleoloa mo a latou su’esu’ega, ae o lea gaioiga solitulafono ua faaalia i lagona o tagata ua latou silasila iai i luga o fesoota’iga televavave le social media, e lē o se fe’au lelei o loo momoli atu ai, mo isi tupulaga ma tagata o le tatou atunuu.
O ata o ni taulelea e to’atolu o loo masalomia na aafia i lea gaioiga ua faasalalau e nisi i luga o le api o foliga ma o se isi lea fesoasoani i leoleo ia latou su’esu’ega.
