O sailiiliga ma suesuega e faia e le Komesina o Sulufaiga ma lona ofisa i ni mataupu, e manaomia ona tutoatasi e aunoa ma le faalavelaveina e se malosi tau pulega malo, poo ni faiga faapolokiki. O se finagalo lea o le alii Komesina o Sulufaiga mai Niu Sila o loo i Samoa ma sana aumalaga, ina ua fesiligia e tusitala i le autu o lona afea o le tatou atunuu.
Faaalia e le afioga Misa Peter Boshier le Komesina o Sulufaiga a Niu Sila, o le atunuu o Vanuatu i ni tausaga ua mavae sa lotolotoi ai le ofisa o le Komesina o Sulufaiga o lena Malo i le suesueina o pulega faaalatua ma piopio i totonu o lea malo tuaoi, ma faamalolo ai ni Minisita o le Kapeneta ona o o latou aafiaga i ia faiga.
O le taua lea o le tutoatasi o le Komesina o Sulufaiga i le faatinoga o ana galuega fai e tusa o tulafono o loo taiala ai le faatinoga o ona tiute. I le mataupu i aiātatau, e feteenai pea ma nisi o tu ma aganuu faapasefika e pei o Samoa, na faaalia e le Komesina o Sulufaiga a Niu Sila, o le tasi lea o itu e sili ona maaleale, pe a oo ina fofola le taua o aiātatau a tagata, e iai ona to’a e feteenai ai ma talitonuga faalelotu ma tapuaiga, aemaise o pulega i faiga tau tu ma aganuu e pei o Samoa e iai le pulega a matai i nuu ma afioaga.
O le Aso Lua o lenei vaiaso ua faatautaia ai e le afioga Misa Peter Boshier se aoaoga mo le aufaigaluega a le ofisa o le Komesina o Sulufaiga i Samoa faapea nisi o ofisa sinia mai nisi o matagaluega a le Malo. O le alii Komesina o Sulufaiga a Niu Sila na faaee iai le suafa Misa o Falelatai i ni tausaga ua tuanai o se faaaloalo.
O le ava faatali na faafeiloai ai le afioga Misa Peter ma lana aumalaga sa faia i le maota Samoa o le Pulega o Tagata Tafafao, ma sa faatino lea faaaloalo e le tamaitai Komesina o Sulufaiga o Samoa le afioga Luamanuvao Katalaina Sapolu, ma lona ofisa.
