O loo faagasolo ile faletalimalo o le Taumeasina Island Resort se mafutaga a sui faipule o le paeaiga lona 17 a le Palemene o Samoa, o se avanoa o loo faamanino ma faamalamalama ai e le ofisa o le fono aoao faitulafono, vaega taua e ao ona nofo silafia e faipule io latou tiute faasui usufono, o le faagasologa o taualumaga o fono, o le avea ma sui o komiti, ma ia silafia aiaiga o tulafono tumau.

O le mafutaga lenei sa tatau ona faatino ile tuanai o le palota tele ile tausaga na tea nei, ile maea ona faatauto o sui usufono o itumalo, peitai ona o tulaga le mautonu sa iai upufai ille tuanai o le faiga filifiliga a le atunuu i a Aperila o le tausaga na tea nei, na mafua ai ona le faia lea mafutaga e taua tele i faipule o le taimi muamua lenei ua avea ai ma sui usufono.

Faaalia e se sui usufono o se isi o mataupu sa laga o le dress code poo laei talafeagai mo sui faipule i taimi o fonotaga, lea sa lagona ai se finagalo pe le ua tatau ona tatala le avanoa e laei ai suti e faaaoga ai ofuvae uumi. O le taimi nei o iefaitaga, fusiua, ma le laei i ofutino ma peleue mo alii ae o puletasi mo tamaitai, pau ia o laei e faatagaina.

O loo faamanino ai foi ile mafutaga ma le mataupu ile tulafono tumau o amio ma tulaga aloaia o le Palemene e tatau ona tausia ma usitaia e sui usufono uma. O le aso Gafua na amata ai le mafutaga lenei ae maea ile tofi o le vaiaso nei.