O le manaomia tele o tagata mai atunuu o le Pasefika e aofia ai Samoa i galuega faavaitaimi i Niu Sila ma Ausetalia, ua oia ai ma nisi o auaunaga tau galuega i atunuu o loo aofia i le polokalame, ma o se tasi o mataupu o loo talanoaina i le fono faaletausaga mo galuega nei o loo usuia i le faletalimalo o le Taumeasina i le vaiaso nei.

I le saunoaga a le Minisita o le Matagaluega o Pisinisi Alamanuia ma Leipa o loo avea nei ma sui Palemia le tofa Leatinuu Wayne Sooialo e tatala ai lea fonotaga o loo auai le silia i le toa selau sui o atunuu o le Pasefika, ua ia faailoa ai atugaluga o Samoa i le afaina o nisi o auaunaga tau galuega i lo tatou atunuu ona ua tuua ai ei latou e iai tomai aoaoina i galuega i le atiina ae o tagata tafafao, ae malaga i galuega faavaitaimi.

E ui i ia aafiaga peitai na faailoa e Leatinuu le tāua o galuega nei ona o tupe maua mo aiga tainane le tafe atu i le tamaoaiga e pei ona sa molimauina i le lua tausaga ua mavae a o tapunia tuaoi faavaomalo o atunuu ona o le faamai.

O le pine o le tāua o ia galuega ma tupe faamomoli e maua ai na faailoa e le sui Palemia le minisita foi o loo iai le vaaia o galuega faavaitaimi i lo tatou atunuu, o le 12 masina ua tuanai e tau mai i le faaiuga o Setema e 791 tesimale fitu miliona na maua e Samoa i tupe faamomoli.

O se siitaga maualuga tele pe a fua i le 12 masina o le tausaga 2020 i le faaiuga o Setema o le tausaga na tea nei 2021, e 687 milion tala na maua i tupe faamomoli mai fafo i galuega faavaitaimi ma tupe lafo mai aiga ma fanau a le atunuu o loo tautua ‘aitaumalele auā le manuia o aiga ma lo tatou atunuu.

O se vaega lenei o le saunoaga a le Minisita le sui Palemia le tofa Leatinuu Wayne Sooialo i le gagana Peretania.

O le fono faaletausaga lona 6 o le Pacific Labour Mobility o loo talimalo ai Samoa, o se faatasiga e soalaupule ai faafitauli o galuega faavaitaimi, ma saili ai foi ni fofo i ia faafitauli ma luitau aemaise o ni auala e faaleleia atili ai.