Na faamatala mai e le tamaitai o Haylani i sana video analeila sina to’a na tau tulai mai ma faatuai ai le latou faigamalaga mai Vietnam a o agai atu i Cambodia i le taeao analeila.
O le itu lelei, sa faamatala lava e Haylani ma ‘ata e iloa ai o loo to’a lelei pea ma ‘ata’ata a o faamatala mai le mea na tupu, o se uiga lelei e iloa ai e lē o faataga e le tausala ne’i to’a e tuta’ia ai ana tapenaga mo le tauvaga.
O le tuaoi o Vietnam ma Cambodia lea na ta’ua e Haylani na taofia ai o ia ma tāpā le tatau ona totogi atu le $500 tala Amerika faatoa mafai ai ona ia sopoia lea tuaoi.
E lei matuā auiliili mai e Haylani poo le ā se mafuaaga ae pe na oo foi ona totogi lea tupe na tāpā ane, ae o lana tala, ua maofa lava pe aisea ua piki ai lava o ia mai le toatele o tamaitai tauva sa latou faimalaga faatasi.
O lana video lava lea na faailoa mai ai e Haylani, e toetoe o tamaitai uma o loo latou tausinio, e leai so latou malamalama poo fea e iai lona atunuu o Samoa, ae na ia faalauiloa mai tamaitai tauva mai Niu Sila ma Ausetalia ma ia ta’ua ‘my sisters’ poo ‘o o’u uso’, auā na o laua foi ia e iloa ma malamalama i le atunuu o loo ia tauva atu ai, o Samoa.
