Ua faamaonia mai e le afioga i le Sui Komesina o Leoleo, Papalii Monalisa Tiai-Keti i le feiloaiga ma tusitala e oo mai i le taimi nei o loo tau sailia pea e leoleo le tamaitai taufaavalea ia Lyn Nauer e pei ona iloa ai e le toatele. 

E pei ona silafia o lenei tamaitai na faaulu atu ai le tagi a nisi o le mamalu o le atunuu lea na ave iai a latou tupe ma le faamoemoe e faagaioi ai a latou pepa mo galuega faavaitaimi peitai mulimuli ane e leai se malaga na taunuu. 

O Lyn Nauer mai Lepea ma Laulii e pei ona lipotia ai o loo sailia ina ia mafai ona faia moliaga o le taufaavalea faasaga ia te ia. 

Ta’ua e Papalii e to’a 8 i latou ua mae’a ona faaoo atu a latou tagi tusitusia e faatatau i lea tamaitai e le o aofia ai ma isi tagata o loo lipotia mai e isi e faapea o latou foi na aafia ai i lenei gaioiga le alofa. 

Ua toe fautuaina ai e le Matagaluega le atunuu atoa aemaise i latou o loo faamoemoe e fia malaga i galuega faavaitaimi ina ia mautinoa e na o le Matagaluega a le Malo le MCIL e tatau ona agai ai mo lea vaega ina ia tuuitiitia ai le tele o tupe ma’umau ma le taimi alu i tagata taufaavalea.