E toa 29 tagata Niu Sila o loo lesitala o loo aumau i Turkey lea ua silia ma le 2 afe tagata ua lipotia mai ua maliliu ai i se mafuie na lūlū ai.
O le faamatalaga mai le matagaluega o le va i fafo a Niu Sila e le o iai ni faamatalaga e ta’ua ai ua aafia nisi o i latou ia i le taimi nei ma o loo mataitu nei e le ofisa o Niu Sila i Ankara lea faalavelave ma faafesootaia i latou ia pe iai se tasi o aafia.
Fai mai e oo mai i le taimi nei e lei oo atu se valaau mo se fesoasoani mai le ofisa o le konesula e tusa o lenei faalavelave ae ua faailoa foi e le ofisa o le va i fafo ua fautuaina tagata Niu Sila i Turkey ina ia usitaia fautuaga mai leoleo i lea atunuu ma ia lesitala o latou faamaumauga i le upega tafailagi a le SafeTravel.
O le mafuie malosi e 7.8 i le fua mafuie na aafia ai lea atunuu ma isi atunuu lalata ane e pei o Suria i le aso ananafi ma e faitau afe foi ua lipotia o loo manunua.
E tele fale tetele na toulu ma tanumia ai tagata ma o loo ta’ua e iai le talitonuga e faasolo pea ina siitia le aofai o le au maliliu mai lenei faalavelave.
