Tali le telefoni, tali imeli, faafoi le telefoni e le maua poo miss calls, tali feau tusitusia poo text, o nisi ia o fautuaga a le Palemia i faauluuluga o nisi o Matagaluega, o Faalapotopotoga ma Pulega a le Malo ua faatautō i le vaiaso nei.

O le toasefulutolu o faauluuluga poo ofisa sili ua faatautō ua mae’a ona faamautū o latou filifiliga e le Kapeneta ae o lea faato’a faatino lē tasi lea o vaega tāua i aiaiga o a latou konekarate ta’i tolu tausaga, i le tuana’i o le 12 masina poo le tausaga talu ona amata pulega a le faigamalo fou.

Advertisement

O le galuega e tele lu’itau, ae o le fautuaga a le ta’ita’i o le malo tautuana ma o le ofisa sili ua filifilia ma faatautō ia tautua le malo ma Samoa i le mea e gata ai le mafai.

O faauluuluga poo ofisa sili ua faatautō ua galulue i le Matagaluega o A’oga ma Aganuu, Matagaluega o Faatoaga ma Faigafaiva, Matagaluega o le Soifua Mālōlōina, Matagaluega o Fesootaiga ma Faamatalaga Faatekonolosi, Matagaluega o Taaloga, Matagaluega o le Tiute, Matagaluega o Tupe Maua, Matagaluega o Leipa, Pisinisi ma Alamanuia, Pulega o Uafu ma Taulaga, Matagaluega o le Atinae o Itumalo, Auaunaga tau Falemeli, Faalapotopotoga o Teugatupe o Mavaega Tausi le UTOS, ma le Faalapotopotoga o Vaa a Samoa.