O se polokalame faalauiloa ma ni a’oa’oga mo i latou o umia tofiga o le Malo e pei o minisita o le Kapeneta latou te silafia ma manino ai i le tāua o le pitolaau tauave a ē o loo galulue i le tomai faatusitala ma faasalalauga, e mafai ona taofia ai le toe tulai mai o faafitauli e fesiligia ai le va lelei o le faatinoina o lea tautua, ma i latou o umia tofiga maualuluga i le Malo.

Ua faaalia lea tulaga e le tamaitai Peresetene o le faalapotopotoga a tusitala ma le aufaasalalau a Samoa le JAWS, o Lagi Keresoma, ona o se faasalalauga faalauaitele mai le faalapotopotoga ua ave ai le tuualalo i le Minisita o le Matagaluega o Fesootaiga ma Faamatalaga Faatekonolosi le afioga ia Toelupe Poumulinuku Onesemo, e faatoese i le tamaitai tusitala o le nusipepa o le Samoa Observer e mafua i le tulaga na faatino ai e le minisita le faatalanoaga ma le tusitala, ina ua tāpā sona finagalo i tuuaiga o lona aafia i le sau o le vaa mai Amerika Samoa e leai ni pepa, e pei ona faia iai suesuega a leoleo i le taimi nei.

O le taofiofi o le tusitala i le ofisa o le minisita mo le umi e 2 itula, a o tau saili e le minisita nisi e maua ai faamatalaga i le mataupu, ma tala na ia faia i le tusitala na ta’u faatauvaaina ai lana galuega, ma faamata’u i se tagi o le a faaulu i leoleo, ua faaalia e le peresetene o le JAWS i se faatalanaoga, ua lē o se aga tausili lea e faia e se minisita o le Malo. 

O se faatalanaoga ma le Peresetene o le faalapotopotoga o tusitala ma le aufaasalalau a Samoa.

Sa saili se finagalo o le minisita i le faia o se talosaga i lana failautusi mo se avanoa e feiloai atu iai mo sona finagalo, ae mae’a le Aso Lulu ma mānava galuega e lei maua mai se faaaliga i lana failautusi.