O le itumalo o Gagaifomauga Numera 1 o se isi lea o itumalo o le motu tele i Salafai ua mae’a ona umusa lo latou ofisa tutotonu o le fono faavae, ma ua faamatuu iai le vaegatupe 425 afe muamua o le uluai miliona mo itumalo faapalota e 51.

Faaalia e le sui faipule o le itumalo ina ua mae’a ona faamautu le sainiga lima ma le Minisita o Tupe ma sui o le matagaluega o tina ma tamaitai o loo vaaia le poloketi o le tasi le miliona, e eseese manaoga o itumalo ma ua sauni ai e momoli se tuualalo i le Malo i totonu o le Palemene, e talosagaina ai le faia o ni suiga i faiga faavae o le poloketi.

Faaalia e le afioga i le faipule tamaitai le tofa Faimalotoa Kika Stowers Ah Kau, e iai aiga o lona itumalo e limavaivai ma e manaomia tele le seleni.

O le itumalo o Gagaifomauga Numera Muamua, e le gata ua sauni mo le faaaogaina o lana 425 afe muamua o le tasi le miliona, ae ua tauaao foi le vaegatupe e 150 afe mo tupe faaalu mo tagata faigaluega o le latou ofisa tutotonu faapea alauni o le komiti o lana fono faavae.

O isi itumalo ua faamautu foi le maua o ia vaegatupe e lua, o Faasaleleaga Numera Tasi ma le itumalo o Aana Alofi Numera 4.

O itumalo o Falealupo, Faasaleleaga Numera 4, Palauli 2 ma Gagaemauga 2 ua faamautu le sainia o maliega mo le faamatuuina iai o le vaegatupe mulimuli 425 afe o le uluai miliona mo itumalo faapalota.

E tusa ai ma faamaumauga ua faalauiloa mai e le matagaluega o tina ma tamaitai atina’e o afioaga ma agafesootai o loo pulea le faagaioia o le poloketi tasi le miliona tala, o le 82 pasene o itumalo e 51 ua mae’a fausia ofisa tutotonu ma ua faaaoga.

O le 96 pasene o itumalo palota ua mae’a tuuina atu lipoti a suetusi i le faaaogaina o tupe o le poloketi, 77 pasene o itumalo ua mae’a ona saini ma faamatuu iai le 15 pasene o le vaevaega muamua o tupe o le poloketi.

E 94 pasene o itumalo ua mae’a tuuina atu i le komiti o loo mataituina le poloketi a latou fuafuaga o atina’e, o le 69 pasene o itumalo ua faamatuu iai le vaegatupe muamua e 425 afe o le uluai tasi le miliona tala lea o loo faatino i le tausaga faaletupe o loo faagasolo i le taimi nei, o le 8 pasene o itumalo e 51 ua mae’a tuuina atu i le komiti o le poloketi a latou lipoti o le faaaogaina o le 425 afe tala muamua, ma le 77 pasene o itumalo ua atoa uma a latou tagata faigaluega mo le faafoeina o le poloketi.