O le Matagaluega o Tina ma Tamaitai o loo taimiua i le atinae e ala i le taiala ua faaigoaina i le gagana faaperetania “The Samoa National Prevention Framework for Ending Violence Against Women and Girls” poo le taofia o sauaga faasaga i Tinā ma Tamaitai.
O lenei faamoemoe i le tatalaina ai o le taiala mo le taofia o sauaga o Tina ma tamaitai na omai faatasi ai le Matagaluega o Tina ma Tamaitai, Atinae o Nuu ma Agafesootai, faatasi ai ma le Matagaluega o leoleo ma Faalapotopotoga uma o loo unaia le taofia o nei sauaga.
O le afioga i le Minisita o Tina ma Tamaitai Leota Laki Lamositele na saunoa i le saunoaga autu ma ia faamamafa ai le taua o lenei faavae o se galuega e puipuia ai tina uma o Samoa faapea tamaitai mai soo se sauaga.
I faamaumauga i le fainumera o tina ma tamaitai i totonu o Samoa o loo aafia i nei sauaga pe tusa ma le 60% o tina e aafia i sauaga i le va ma lona toalua (intimate partner violence), 20% o tina ua ripotia e fai iai sauaga matagā (rape) ae 10% o tina ma tamaitai e faia ai uiga mataga a tagata lava o latou aiga (incest).
E $1miliona tala le fesoasoani a le Mālō i lea atinae taua lea o loo galulue ai matagaluega a le Mālō ma ona Faalapotopotoga ae le gata i lea o le Malo Aufaatasi le UN.
O le manatu maualuga o le taiala ua faalauiloa ma tatalaina nei ina ia mautinoa le taofi ma aua nei toe alia’e mai soo se ituaiga sauaga e aafia tina ma tamaitai i totonu o Samoa.
