Ua faamautu nei le tatalaina aloa’ia i le Aso Faraile o le vaiaso asau, le aso 26 o Aokuso, o le galuega sa faatupe i se fesoasoani a le Malo o Saina le Friendship Park, e pei ona faamaonia mai e le Minisita o Galuega tetele a le Malo o loo iai ma le vaaia o le poloketi o le Waterfront le tofa Olo Afoa Fiti Vaai.
O Iulai o le tausaga e 2018 na sainia ai e le Malo o Samoa ma le sui o le Malo o Saina i lo tatou atunuu lea fesoasoani o se meaalofa. O le nofoaga o le Friendship Park ua iai le vaega e tafafao ai fanau ma fai ai taaloga, o le vaega e faia ai sauniga faapitoa e pei o ni faafiafiaga, faapea nofoaga mo fale’aiga.
Ua fetaui le taimi o le a tatala ma umusa ai lea galuega ma le tapena ai o le Malo ma le atunuu i le vaiaso o faafiafiaga o le 60 tausaga o le Tuto’atasi. O le a tuuina aloa’ia atu e le Minisita o galuega lea nofoaga i le pulega o tagata tafafafo mo le faaaogāina.
