O le faalapotopotoga o Fale a le Malo o le uluai faalapotopotoga lea a le Malo ua ma’oti le iai o le fale ma le fanua ua mae’a faatauina ma fausia.

O le taeao analeila na tatala aloaia ai lenei fale e tusa lona tau ma le $1.5 miliona tala i le nofoaga sa iai le fale ofu a le CCK i Apia.

O le Minisita o Pisinisi Alamanuia ma Leipa o le Minisita foi lea mo lea faalapotopotoga, Afioga Leatinuu Wayne Sooialo na saunoa e tusa ai o lenei galuega.

“O le tau fuafuaina mo lenei poloketi e $2.2 miliona tala e aofia ai galuega o suesuega faainisinia mo le iloiloina o le malosi o le fale, tusiaina o le ata, fausiaina o potu mo ofisa, galuega o le eletise, ea malulu ma nisi o vaega moomia.

“O lenei galuega e lei faamatuu atu mo se konekarate se tasi, sa vaevaeina i vaega eseese, ma sa faatinoina ai tauofoga mo ni konekarate.”

E 12 konekarate eseese sa feagai ma le faatinoina o lenei galuega.

Na ta’ua ai e Leatinuu o se tala fiafia le mae’a ai o le galuega e na o le $1.5 miliona tala le tupe sa faatino ai.

“Sa mafai ona faasaoina mai se vaega tupe tele e sili atu ma le ‘afa miliona, e fua i le tau sa fuafuaina.

“E ui e lei mulimulitai e le faalapotopotoga faiga faavae ma auala a le Malo mo le faatinoga o faatauga poo procurement process masani mo galuega tetele faapenei ae avatu pea le agaga o le faamalo i le Komiti Faatonu ma le pulega i le sogasoga ia tino mai lenei galuega.

“Sa faatupeina lava lenei galuega e ala i tupe faasili a le faalapotopotoga aemaise ai o le fesoasoani mai o ana paaga le UTOS, NPF ma le Samoa Commercial Bank.

O le tau aofai o le fanua ma le fale lenei ua mae’a faafouina e tusa lea ma le $4.1 miliona tala.

Ona o le tulaga o le faaopoopoina o le aufaigaluega a le faalapotopotoga aemaise o auaunaga sa finauina ai e le Minisita lenei galuega ia mafai ona faatinoina.

“O itu lelei o lenei poloketi ua mafai ona tuufaatasia ai le aufaigaluega e faatinoina le tele o galuega ae le gata i lea ua foia ai le faafitauli o le nofo lisi o le faalapotopotoga ua mafai ai nei ona faasaoina ai nisi o ana tupe maua.

“E le gata ua siitia ai le tulaga o le faalapotopotoga ae le gata i lea ua mafai ai foi ona faamatagofie ai lenei vaega tu taulaga.”

Ua mae’a lenei galuega a o lea foi ua amata ona togitogi atu e le faalapotopotoga e ala i se vaega o ana tufatufaga poo le dividend e $600,000 o ana tupe faasili mole Malo.

O le faalapotopotoga o Fale a le Malo sa faatuina lea ina ua mae’a le afa o Ofa ma Valelia i le 1990 i lana auaunaga o le ofoina atu o le fesoasoani e ala i nonogatupe e māmā tului, mo le faaleleia o maota ma laoa faapea le faatauina atu o fanua umia saoloto ile mamalu ole atunuu.