O le poloketi ua ta’ua o le Digital Pasifik o loo taimua ai le faletusi a Niu Sila ma Ausetalia, lea ua mafai ona oo mai i Samoa nei e toe faatalanoa nisi o faalapotopotoga i le faaaogaina o le upega tafailagi, e teu ai faamaumauga tāua e pei o tusitusiga ma ata i talaaga o le atunuu mai anamua ma nisi o faamaumauga i le aganuu.
O le sui mai lenei poloketi mai Niu Sila, Taputukura Raea na faaalia le auga o lenei poloketi.
“O le matou website lea e faaaogaina e teu ai nei faamaumauga o se vaega lea e faigofie mo nai o tatou tagata i le Pasefika ona saili faamaumauga i soo se mataupu i atunuu taitasi.
“E aogā tele lenei vaega i fanau aoga ia latou meaaoga poo assignments ia faafaigofie ai ona o latou maua faamaumauga ae le gata i lea o i latou o loo suesueina nei vaega i Iunivesite.
“E faapea foi i aiga ma tagata o loo i fafo pe a manaomia ona fia malamalama i talaaga o le Pasefika.”
O le toe malaga mai ai i Samoa nei o le unaia lea o nisi o faalapotopotoga o loo faatinoina le auaunaga i faamaumauga ina ia faafaigofie ai mo i latou e moomia.
“Sa faia foi i tausaga ua mavae la matou faatalanoaga ma le ofisa o polokalame e puipuia le siosiomaga i le Pasefika poo le SPREP.
“O le ofisa lea o se tasi o vaega o loo tuuina nisi o faamaumauga i luga o le website lea mo soo se tagata e manaomia ni faamaumauga.”
O lenei poloketi o loo faatupeina e le ofisa a le Va i Fafo a Ausetalia.
