E fā ni faaaliga e faia i laufanua o Iapani ma o loo tuuina mai ai le avanoa e ofisa a le Pasefika i Iapani mo ni faipisinisi o loo gaosia oloa e pei o le kofe, tea, cosmetic faapea ai ma oloa gaosi mo le fofoga taumafa.

Na faaalia e le sui o fefaatauaiga i Iapani, Momoko Yagishita, o lenei faamoemoe ina ia fesoasoani lea i pisinisi mai le Pasefika e ala i fefaatauaiga.

“O le faamoemoe o le ofisa lenei sa faatuina e le Malo o Iapani ma le Pasefika ina ia fesoasoani e faalauiloa ai oloa e le gata i lea o le itu tau turisi mai le Pasefika i Iapani, lea e mafua ai le avanoa o loo tuuina atu ia tatou faipisinisi i Samoa.”

“E tele ni vaega o loo tapena iai le ofisa o le Pasefika iinei ma o loo faasalalauina atu ai i luga o upega tafailagi ni aufaipisinisi o oloa o loo ta’ua atu ai auā nisi o faaaliga o loo sauniuni iai.”

Na iai nisi o pisinisi mai Samoa nei sa auai muamua i nei faaaliga.

“O le tausaga 2017 sa auai ai le Misiluki ua ta’ua o le International Gift Show o isi faaaliga na auai ai le Living Koko ma le Natural Foods International i le faaaliga o meaai taumafa o se tasi o faalauiloa tele i le atu Asia.

“Atonu o se avanoa tāua tele mo pisinisi mai Samoa e faipaaga ai ma pisinisi i Iapani e tauala atu i nei faaaliga auā le alualu i luma o tamaoaiga e le gata mo pisinisi lava ia aemaise ai foi tamaoaiga a le atunuu.”

O nei faaaliga e faatautaia lea i Tokyo mai le masina o Setema ma nisi o faaaliga e faia lea i le amataga o le tausaga fou.