O le tumutumu ai o le taulaga faatau i Magele i le taeao o le Aso Toonai na avea ma avanoa na molimauina ai e le toatele o tagata Pasifika o loo aumau i lea pitonuu le matagofie o taumafaiga a nisi o alo ma tamafanau o le Pasifika e ala i se pisinisi ua tatala aloaia i totonu o Magele.
O lea auaunaga poo le faleoloa ua faaigoaina o le Nesian Collective, ma ua faaaogāina e nisi o tamafanau a le Pasifika e faatau ai a latou oloa, o ni taumafaiga o loo gaosia lava e latou i taleni ma meaalofa ua foaiina ai e le Atua.
O loo faatauina ai lavalava, o meataulima e pei o tautaliga, o ula, mama ma asoa, faapea foi ma gasesega i kuki, keke ma pai auā le fofoga taumafa o le atunuu.
Na tatala polokalame i le sauniga lotu ona sosoo lea ma faafiafiaga a nisi o le fanau faasolo atu ai i le ootiina o le lipine e i latou uma o loo galulue faatasi i lea faleoloa.
O se sao tāua o le faleoloa o le Nesian Collective ua mafai ai ona galulue faatasi ma faafesoaa’i le aufaipisinisi a tagata Pasifika, ma e valu pisinisi laiti o loo mafai ona iai i totonu o lea auaunaga.
E oo mai i le taimi e tuufaatasi ai le tatou lipoti e lei maua se avanoa ma le tamaitai ia Toni Helleur i sana saunoaga i le tāua o le auaunaga a le Nesian Collective.
