Ua tatala i tua e le Faamasinoga le alii o Fialelei Vaifale Sepetio e 21 tausaga le matua, mai Samalaeulu o loo molia i le fasioti tagata faamoemoeina.
O le masina na mavae nei na tulai mai ai lenei faalavelave ina ua feeseesea’i Fialelei ma lē ua maliu i se inuga ava malosi sa faia.
O lē ua maliu o se tamā 22 tausaga le matua, o se maupaolo i Samalaeulu.
Na talosaga le alii loia o loo tulai mo lē ua molia e tatala i tua, ma talia ai loa e le faamasinoga i aiaiga ia aua lava ne’i tuvae i Tuasivi ma Fogapoa ae ia nofo i lona aiga i Vaiusu, ia tuuina atu pepa malaga ma saini i le ofisa o leoleo i Aso Lulu ma Aso Faraile taitasi.
O le aso 19 lea ua tuuina iai le mataupu e toe valaau ai seia talanoa atu le loia a lē ua molia ia te ia ma tuuina mai sana tala i le moliaga o le fasioti tagata faamoemoeina i lea aso.
