O Vincent Patelesio Smith ma Victoria kalapu, faapea le tamaitai o Sharlene Fidow ma le alii o Michael Savali, ua tatala nei i tua e faatali ai le faamae’a o moliaga a leoleo, ae o le alii o Laki Junior Silver ua nofo taofia pea i le vaaiga a leoleo e faatali ai le aso 5 o le masina fou o Iuni e toe tutulai ai i le faamasinoga maualuga.
O i latou uma nei sa nofo taofia i le vaaiga a leoleo i le mae’a o le osofaiga poo le raid a leoleo na alu i le fale o se aiga i Toamua uta i le aso 6 o le masina nei o Me.
O le tootoo o le afioaga o Toamua na tu e tafi ese ai le aiga e ana le fanua ma le fale, ua faailoa mai e se matai o le nuu i se feiloaiga anapo, ua faatolu ona oo atu leoleo e faamalamalama le tulafono i le tausiga o le filemu aemaise o eleele umia saoloto o loo nofoia e le aiga.
Faaalia e le matai o le Aso Gafua o le vaiaso nei na fono ai le nuu ma toe feiloai ai ma leoleo, ae e le o suia le finagalo o le afioaga i lana faai’uga.
O le tatala i tua o Vincent Patelesio Smith 62 tausaga o le soifua ma Victoria Kalapu, na talosaga ai Vincent e fia nonofo faatasi ma Victoria ona o loo ma’itaga e manaomia lana vaavaaiga i taimi uma i le ave lea i le fomai.E leai ni tali ua tuuina atu e i latou e toalima o loo molia i le umia o le ‘asia, maruana, ma laau malosi se’i tālia moliaga faaiu a leoleo pe a toe fofogaina le mataupu i le masina fou.
