O le talavou lea na molia i le faalavelave na maliliu ai talavou e toalima ina ua lavea le taavale na malaga atu ai, ua faailoa i le asō ua toe tatala nei i tua ina ua tuuina mai se faaiuga mai le faamasinoga maualuga i Niu Sa Uelese.
O le 7News na o latou lipotia o le alii o Tyrell Edwards, 18 tausaga le matua ua mafai ona agai i le fale ae iai tuutuuga, sei vagana ua o ane faatasi ma lona tina.
Sa taofia pea i le vaaiga a leoleo talu ona tupu le faalavelave ma fai mai le faamasino i lana faaiuga ua fai si umi tele o le taimi e taofia ai lea alii talavou a o faatalia lona faamasinoga ma o loo ia faalogoina foi le mafatia mai le faalavelave na tupu.
Sa muai teena le talosaga e tatala ai i tua i le masina o Setema peitai la o lea ua toe tuuina mai le faaiuga mai le Supreme Court ma le faatonuga ia aua nei fesootai i molimau o le mataupu lenei, ma o le masina fou o Novema e toe tulai ai le faamasinoga i Picton.
