O le alii lea sa tuua’ia i le taumafai e toso atu se teine aoga i Aukilani i totonu o lana loli i le masina talu ai, ua lipotia ua toe tatala i tua ma aiaiga e lē tatau ona toe taumulimuli, taofia pe fesootai ma se tagata e i lalo ane o le 18 tausaga le matua.
O lea tagata mai Henderson 56 tausaga e pei ona lipotia i le RNZ, na tulai i le faamasinoga i Waitakere i le asō ma molia i le faaoolima i se tamaitai.
Na taliaina e le faamasino lana talosaga e taofia le faailoaina o lona igoa ma faasā foi ona pueina ata poo ni video o lea tagata ele au faasalalau na iai i le faamasinoga o le vaitaimi o le Eseta lea na tupu ai le mataupu lea na taumafai ai lea alii e faatalanoa le teine aoga e pei ona ta’ua i le aso 19 o Mati i Titirangi, taumafai e toso atu le lima o le teineititi i totonu o le taavale peitai na mamulu le lima o le teine aoga ma sola ese ai loa agai i lo latou aiga.
Afai ae faamaonia moliaga o le faaoolima i se tamaitai e ono oo atu i le 2 tausaga le faasalaga i le falepuipui.
O le faaiuga o le masina nei ua ta’ua o le a toe valaauina ai le mataupu i le faamasinoga ma ua faailoa foi e le leitio faavaomalo a Niu Sila o isi aiaiga o le tatala i tua ua faasā ai ona toe agai i Titirangi pe taumafai e faafesootai lē o loo tagi.
Puna o Faamatalaga: https://www.rnz.co.nz/news/national/513510/bail-for-man-accused-of-grabbing-schoolgirl-in-west-auckland
