I se faasilasilaga faapitoa mai lana afioga i le Sui Palemia, Tuala Tevaga Iosefo Ponifasio, na ia faasilasila mai ai nisi o iugafono a le Kapeneta i le latou fonotaga masani i le aso ananafi. O se tasi o na iugafono e faasino tonu i aiaiga mo puipuiga o tagata o loo faimalaga atu i Samoa, mai faama’i pipisi.
E amata atu i le asō, Aso Tofi, 22 Setema, ua faamaonia mai ai suiga nei:
1. aveesea uma le manaomia o siaki faafomai, PCR, RAT sa moomia ona faia o le ulufale i Samoa
2. aveesea le moomia ona faaalia o se pepa tui e mafai ai ona ulufale i Samoa
3. lē toe iai ni siaki faafomai e faia pe a taunuu i Samoa
4. faamalosia le faamaoni o tagata e faatumu pepa a le soifua maloloina o loo tufa i totonu o vaalele
5. faasalaina ma molia le tagata i le taufaasese pe a lē faamaoni e faatumu sa’o lea pepa.
6. fautuaina pea le tausisia o puipuiga faasoifua maloloina lautele e aofia ai le faia o punifofoga
E le toe iai se faatuai e faagasolo ai le taunuu mai o tagata i le malaevaalele. O le a faaauau pea ona mataitu e le Matagaluega o Soifua Maloloina nisi e ofi mai ma ni faama’i i totonu o le atunuu.
