Ua aumai i se tulaga lautele se faamatalaga ma le kamupani o le Travel Focus i Hong Kong sa lotolotoi i le tapenaina o malaga tuusa’o mai Saina mo Samoa, ma ua faamanino ai nisi o vala o loo nofo lē malamalama ai nisi ua faitioina lea taumafaiga.

Ua faaalia e le Travel Focus ua 12 tausaga o tapena ni malaga tuusa’o mai Saina, o se taumafaiga ua taunuu ma ua faailoa ai e le kamupani o le uluai aumalaga lea na taunuu i le aso 28 o Me ua latou sasaa i le tamaoaiga o Samoa se tupe e tusa ma le tasi le miliona selau afe tala.

O se taumafaiga sa galulue ai le Travel Focus ma le susuga Laauli Leuatea Polataivao Fosi Schmidt i le 12 tausaga o faagasolo feutanaiga, ae ina ua faamautu le amatalia loa i le tausaga nei, ae maua atu le isi logo mai le pulega o tagata tafafao a Samoa ia toe taofi le fuafuaga.

O se isi lea o to’a na tauau e faaletonu ai le taumafaiga e pei ona faaalia e le kamupani, ae ua tele tausaga o tapena.

O le faafetai a le Travel Focus, ua le toe toloa le taumafaiga ae ua faataunuu.

Ua faailoa foi e le kamupani o auaunaga tau femalagaiga lenei i Hong Kong, e lima isi malaga tuusa’o ua faamautu ma o malaga uma nei, o loo tofutofusia ai faletalimalo eseese ma tulisi e nonofo ai.

Ua faaalia e le Travel Focus o a latou tupe uma o loo faaalu i tapenaga e aunoa ma se seleni a le Malo o Samoa poo le Pulega o Tagata Tafafao.

O loo galulue faatasi lea kamupani ma le faletalimalo o le Sheraton Aggie Grey i le faia o malaga tuusa’o mai Saina.

Ua molimauina le tatala o le vaega o loo iai le nofoaga o taaloga faitupe le Casino i lea faletalimalo i le taulaga o Apia, ma ua iai le talitonuga o le isi lea o nofoaga o loo agai iai tulisi mo tafaoga ma taaalo ai.